БИШКЕК, 31-мар. — Sputnik. Сокулук районунун Селекция айылында болгон унаа кырсыгынан эки адам каза болгонун ӨКМ билдирди.
Маалыматка ылайык, авария кечээ саат 7.30 да болгон. Анда Honda Accord жана Honda CR-V унаалары кагышып кеткен. Натыйжада Honda CR-V машинасынын айдоочусу 40 жаштагы Азамат Шарипов менен беш жаштагы кыз мерт кеткен.
Унаалардын ичиндеги жабыркаган беш кишини жолдо бараткандар шаардык төртүнчү ооруканага жеткиришкен. Ал эми унаада кыпчылып калган жарандардын сөөгүн куткаруучулар чыгарып, тез жардам кызматкерлерине өткөрүп беришкен.
