БИШКЕК, 29-мар. — Sputnik. Үстүбүздөгү жылдын 1-апрелинен тарта окуучулардын жеке маалыматы санарипке өтүп, аны менен бирге электрондук санжыра программасы ишке киргизиле турганын Мамлекеттик каттоо кызматынын төрагасы Тайырбек Сарпашев маалымат жыйында билдирди.
Анын айтымында, ар бир мамлекеттин башкы байлыгы — анын эли, ал эми мамлекеттик саясатты туура жана натыйжалуу жүргүзүү үчүн каттоо жана калкты учетко алуу системасы башкы курал болуп саналат.
"Өлкөдө Калктын бирдиктүү мамлекеттик реестри — адамдын төрөлгөнүнөн баштап анын өлгөн күнүнө чейин каттоого ала турган башкы регистр", — деди Сарпашев.
Аталган долбоордун алкагында Билим берүү жана илим министрлиги тарабынан бир миллиондон ашуун мектеп окуучуларынын жеке маалыматы санарипке өтөт. Мында ар бир окуучуга идентификациялык номер берилип, ата-энеси менен байланышта берилет.
Сарпашев мындай ыкма менен ар бир жарандын генеологиялык тарыхын түзүп чыгууга мүмкүнчүлүк берерин айтты. Мындай электрондук санжыра муундан муунга калып, кийинки урпак өзүнүн ата-бабасы тууралуу кененирээк билүүсүнө шарт түзүлөрү белгиленди.
