БИШКЕК, 27-мар. — Sputnik. Ош шаарында жалпы мечит кызматкерлерине эсеп-кысап иштерин жүргүзүүнү, каржы тармагын жөнгө салуу, мүлктөрдү каттоо боюнча атайын сабактар өтүлдү. Бул тууралуу Кыргызстан мусулмандарынын дин башкармалыгы билдирди.
Маалыматка ылайык, имамдарга эсеп-кысаптын сырларын шаардык казыяттын башкы эсепчиси үйрөттү.
Иш-чара Ош шаарынын борбордук "Сулайман Тоо" мечитинин жыйындар залында өтүп, ага шаар казысынын орун басары Анасхан Ташхужаев, казыяттын башкы эсепчиси Надыров Билалиддин жана имамдар катышты.
Эсеп-кысап иштерин түшүндүрүү учурунда мечиттердеги каржы тармагындагы кириш-чыгыш иш кагаздарын толтуруу, эсеп-кысапты туура жана өз убагында аткаруу маселелери боюнча кеңири түшүндүрмө берилген эрежелер үйрөтүлдү.
