БИШКЕК, 26-мар. — Sputnik. Оппозиция өкүлдөрү Кубанычбек Кадыров менен Бектур Асанов Биринчи Май райондук соттун чечими менен 12-майга чейин УКМКнын камагында калтырылды. Бул тууралуу айыпталуучулардын жактоочусу Разак Ашимбаев билдирди.
Эскерте кетсек, 24-март күнү УКМК оппозиция өкүлдөрүн буга чейин козголгон кылмыш иштин алкагында суракка чакырганын маалымдаган. Ага ылайык, аталган жарандар Кылмыш жаза кодексинин 27 жана 295-беренесинин негизинде өлкөдөгү абалды дестабилдештирүү жана бийликти күч менен басып алууга даярданган деп шектелүүдө.
Ашимбаевдин айтымында, Бектур Асанов бүгүнтөн баштап кургак ачкачылык жарыялады.
Адвокат кечээ Улуттук коопсуздук мамлекеттик комитети бийликти күч менен басып алууга даярданган деген шек менен кармап келген Эрнест Карыбековдун соту эртең, 27-март күнү боло турганын кошумчалады.
