БИШКЕК, 26-мар. — Sputnik. Кыргызстанга Афганистандын тышкы иштер министри Салахуддин Раббани расмий иш сапар менен келип, ал президент Алмазбек Атамбаев жана өкмөт мүчөлөрү менен жолугат. Бул туурасында ТИМ маалымат кызматы билдирди.
Афганистандын тышкы саясат боюнча ведомство жетекчисинин сапарында кыргыз-афган алакаларынын келечеги талкууланат. Тагыраагы, саясий диалогду өнүктүрүү, соода-экономикалык кызматташууну арттыруу жана маданий-билим берүү маселелери ортого салынат. Мындан сырткары эл аралык уюмдардын алкагында өз ара кызматташуу тууралуу да сөз болот.
ТИМ иш-сапардын алкагында соода-экономикалык кызматташуу боюнча өкмөт аралык комиссияны түзүү боюнча эки тараптуу документке кол коюу пландалып жаткандыгын билдирди.
