БИШКЕК, 24-мар. — Sputnik. Россиянын "Ника" киносыйлыгына көрсөтүлгөн кыргызстандык режиссер Мирлан Абдыкалыковдун "Сүтак" тасмасы Москва шаарында 30-март күнү Журналисттер үйүндө көрсөтүлөт. Бул тууралуу Кинематографты колдоо фондусу билдирди.
Эскерте кетсек, кыргызстандык тасма Россиянын кинематографисттер академиясы тарабынан негизделген "Ника" сыйлыгына "КМШ жана Балтика өлкөлөрүнүн мыкты тасмасы" номинациясында ат салышууга чакыруу алган.
"Ника" сыйлыгын тапшыруу аземи 2016-жылдын 1-апрелинде өтөт. Жеңүүчүлөргө байгелер Москва шаарындагы мамлекеттик "Русская песня" музыкалык фольклор театрынын залында тапшырылат.
"Ника" сыйлыгы 1988-жылдан бери тапшырылып келет. 90-жылдан тарта жеңүүчү жашыруун добуш берүүнүн жыйынтыгы менен аныкталат. Мыктылар жеңиштин канаттуу периштесинин элеси чагылдырылган статуэткага ээ болушат. Сыйлыкты Юлий Гусман негиздеп, анын көркөм жетекчиси болсо, Андрей Кончаловский 604 академиктин башын бириктирген киноакадемиянын президенти.
