БИШКЕК, 24-мар. — Sputnik. Ошто транстформацияланган 30 гектар жер 310 миң сомго мыйзамсыз сатылып кеткен факт боюнча козголгон кылмыш иши тергелип бүтүп, Ош шаардык сотко жөнөтүлгөнүн Башкы прокуратура билдирди.
Маалыматка ылайык, кылмыш иши былтыр 19-октябрда козголгон. Анда Ош шаарынын Жапалак айыл кеңешинин муктаждыгын чечүү үчүн өкмөт өзүнүн токтому менен 30 гектар аянттагы айыл чарба жерин калк отурукташа турган жерге которгону айтылат. Ал 154 үлүшкө бөлүнүп, мектеп, бала бакча, дарыкана, ФАП, өндүрүш-өнөр жай комплекси жана башка керектүү инфраструктура салынмак.
Бул боюнча шаардын экс-мэри Жумадыл Исаковго Кылмыш жаза кодексинин 303-беренесинин (Коррупция) негизинде кылмыш иши козголгон.
Тергөө учурунда аталган жер тилкеси 26 миллион 640 миң сомго бааланып, Ош шаарынын мэриясына кайтарылды.
Эми бул кылмыш ишке чекитти шаардык сот коймокчу.
