БИШКЕК, 23-мар. — Sputnik. Полиция кызматкерлери Брюсселдеги аэропорт менен Скарбек коммунасындагы үйлөрдүн бирине ташталган бомбаны террорчуларды аба майданына жеткирип келген таксисттин маалыматы менен табышкан. Бул тууралуу Derniere Heure басылмасына таянуу менен РИА Новости жазып чыкты.
Таксинин айдоочусу терактыдан кийин укук коргоо органдары менен байланышып, жүргүнчүлөр үч эмес, андан көп баштык менен түшүшкөнүн айткан. Дал ушул маалымат аэропорттогу жарылбай калган экинчи бомбаны табууга жардам берген.
Айтылган дарек боюнча Бельгиянын федералдык прокуратурасы тинтүү жүргүзүп, үйдүн ичинен жарылуучу түзүлүш, химиялык заттарды жана "Ислам мамлекети" террористтик уюмунун желегин таап чыгышкан.
Мындан тышкары, басылма укук коргоо органдары терроризм боюнча мамлекеттик коопсуздук кызматынын "кара тизмесинде" турган жашоочуга таандык Renault Clio жана Audi S4 унааларын издеп жатканын белгилейт.
Эскерте кетсек, кечээ, 22-март күнү Бельгиянын борбору Брюссель шаарынын аэропортунда, андан кийин метронун эки станциясында беш ирет жардыруу болду. Кырсык кесепетинен 34 адам каза болуп, 230 киши жарадар болду.
Терактылардын жоопкерчилигин "Ислам мамлекети" тобу мойнуна алды.
