БИШКЕК, 22-мар. — Sputnik. Брюсселде окуган Азим Исмаилов жарылуу болгон "Мальбек" метросунда беш мүнөт мурда болгонун Sputnik Кыргызстан маалымат агенттигине билдирди.
22-мартта Брюсселдин аэропортунда жана метродо катары менен болгон жардыруудан 34 киши каза болуп, 200дөй киши түрдүү жаракаттарды алган.
Исмаиловдун айтымында, ал "Мальбек" метросу аркылуу сабакка барган.
"Сабакка келгенден кийин жарылуу болгонун кабарлардан көрдүм. Чынында аябай шок болдум. Себеби, бул метрого көп түшөм. Сабакка барып, үйгө кайтам", — дейт ал.
Исмаилов ошондой эле, ага туугандары, тааныштары чалып эшикке чыкпоону айтып жатканын кошумчалады.
Брюсселде болгон жардырууларды "Ислам мамлекети" террордук уюму моюнга алды.
