БИШКЕК, 20-мар. — Sputnik. Ош шаарында Султан Ибраимов атындагы улуттук драма театрында "Акындардын падышасы Ош Нооруз – 2016" аттуу акындардын эл аралык айтышы өтүүдө.
Сынакты СССРдин Эл артисти Болот Шамшиев коюуда.
Фестивалдын башкы продюссери Ниязбек Айбашовдун айтымында, сынакта сегиз акын күч сынашууда. Алардын төртөө кыргызстандык акын болсо, экөө Казакстандан, дагы экөө Кытайдан келген төкмө акындар.
"Байге фонду 400 миң сомду түзөт. Анын 200 миң сому — биринчи, 100 миң сому — экинчи, ал эми 50 миң сому — үчүнчү орунду алгандарга тапшырылат. Мындан сырткары, калган беш катышуучу 10 миң сом акчалай сыйлык менен сыйланат", — дейт Айбашов.
Калыстар тобунун мүчөлүгүнө аттын кашкасындай таанымал инсандар чакырылган. Алардын арасында Түгөлбай Казаков, Эгемберди Эрматов бар.
Акындардын айтышын Ош шаарынын мэриясы "Алтын комуз" продюсердик борбору менен биргеликте уюштурууда.
