БИШКЕК, 17-мар. — Sputnik. Учурдагы өкмөттүн курамы президенттик шайлоого дейре ишин уланта берсе туура болот. Анткени президенттик шайлоодон соң, бийлик элитасынын алмашуусу табигый түрдө өз нугу менен ишке ашырылмак дейт көз карандысыз эксперт, экономика илимдеринин доктору Жумакадыр Акенеев.
Анын айтымында, учурда өкмөт дүйнөлүк кризис маалында колдон келген иш-чараларды кабыл алып, өз аракетин жасоодо.
"Өзгөчө жыл башында сомдун курсун туруктуу сактап кала алды жана анын деңгээлин 79 сомдон 71 сомго дейре төмөндөтүүгө жетишти. Рубль жана теңгеге салыштырмалуу сомдун курсу девальвацияга азыраак учурады десек болот. Бул өз кезегинде экономиканы жакшы нукка бурууга салымын кошту. Мисалы пенсия, айлыкты көтөрүүгө мүмкүн болбой турган учурда биринчи муктаждыктагы товарларга, өзгөчө, тамак-ашка карата баалар көтөрүлгөн жок", — дейт ал.
Эксперттин айтымында, жакында өкмөт парламентте өзүнүн антикризистик планын сунуштап, анда каатчылыкка каршы чараларын көрсөттү. Учурда калк анын натыйжаларын күтүүдө.
"Муну менен катар кемчиликтерди айта турган болсок, өкмөт башчы коалициядан келген министрлер менен иштешүүдө кыйынчылыктар болууда, анткени шайлоодо жеңген партия өкүлдөрү министрлик орундарга ар-дайым эле кесиптик жактан мыкты даярдыктагы кадрларды сунуштай албай жатат. Ошол себептүү сунушталган кадрлар менен колдон келишинче иш алып барууга мажбур болууда", — деди Акенеев.
Акенеев билдиргендей, өкмөттүн алып барып жаткан ишине ортодон жогору деп баалоого болот. Азыркы иштеп жаткан өкмөт өз ишинде өтө чоң каталарды кетирди деп айтууга негиз жок, дейт серепчи.
