БИШКЕК, 15-мар. — Sputnik. Улуу Британиядагы Кембридж окуу жайында Эл аралык Нооруз күнү майрамдалды. Бул тууралуу Кыргызстандын Тышкы иштер министрлигинин маалымат кызматы билдирди.
Майрамдык ишчара Борбордук Азия форумунун уюштуруусу жана Кыргызстан, Казакстан, Өзбекстан, Тажикстан, Түркменистан өлкөлөрүнүн Улуу Британиядагы элчиликтеринин колдоосу менен дем алыш күндөрү өткөрүлгөн. Анда окуу жайдын профессорлору, студенттери жана жергиликтүү тургундары катышкан.
Кыргыз элчилиги студенттер коомчулугу жана кыргыз диаспорасы менен биргеликте фото көргөзмө, өлкө тууралуу видео роликтерди көрсөтүп улуттук салт-санаа менен кол өнөрчүлүктү даңазалашканы маалыматта белгиленген.
Мындан сырткары, кыргыз элчилигинин өкүлдөрү британдыктарды быйыл күздө Ысык-Көлдө өтө турган экинчи дүйнөлүк Көчмөндөр оюнуна чакырышкан.
