БИШКЕК, 14-мар. — Sputnik. Ошто табылган жумурткада "Аллах" деген жазуу болушу мүмкүн. Бул тууралуу аны таап алган малчы Жумабай Карабашов Sputnik Кыргызстан маалымат агенттигине билдирди.
Анын айтымында, жумуртка Өзгөн районуна караштуу Семиз-Көл айылында табылган.
"Келинчегим тооктордун жумурткаларын чогултуп жатып, өзгөчө жазуусу бар жумуртка таап алган. Анда арабча жазуу бар экенин көрүп, айылдын молдосун чакырдык. Ал жумурткада "Аллах" деп жазылганын айтты", — дейт Карабашов.
Анын айтымында, бул жумуртканы катардагы эле тооктордун бири тууган.
"Учурда аны сактап койдук. Балким, жөжө бастырууга пайдалануубуз мүмкүн", — дейт айыл тургуну.
Семиз-Көл айылынын молдосу Абдимиталип Карабашовдун айтымында, жумурткада "Аллах" деген жазуу бар.
"Инимдин үйүнөн арабча жазуусу бар жумуртка табылыптыр. Алар арабча окуй албагандыктан мени чакырды. Менин оюмча ал жумурткада "Аллах" деген жазуу бар. Негизи жумуртканы тегерете жазуу бар экен. "Аллах" деген жазуудан сырткары "Мухаммад" деген да жазуу болушу мүмкүн", — дейт молдо.
Бул жумуртканы райондук молдолорго көрсөтүү керекпи деген суроого молдо азыр ага убакыт жок экенин айтты.
"Биз райондун борборунан алыс жайгашкандыктан убакыт жок болуп жатат. Кол бошоп калса эле райондук имамга алып барабыз", — дейт имам.
Айыл башчы Өлбөсаалы Алишеровдун айтымында, мындай окуя биринчи ирет катталууда.
"Баарыбыз таң калып турабыз. Буга чейин мындай окуя болгон эмес. Бул жараткандын кудурети", — дейт Алишеров.
Эске сала кетсек, буга чейин 2011-жылы Ысык-Көл облусунун Сары-Жаз аймагынан геологдор "Аллах" деген жазуусу бар таш табышкан.
Ал эми эксперттердин айтымында, эгерде тооктун жумуртка чыккан түтүктөрү жабыркаса жана жөжө же картайган кезинде тууса жумурткада ар кыл жазуулар пайда болушу мүмкүн.
