БИШКЕК, 10-мар. — Sputnik. Бишкек шаардык сотто мурунку спикер Ахматбек Келдибековдун иши каралып, анда тараптардын жарыш сөз сүйлөөсү уланды.
Алгач 16 томдон турган иш боюнча тактоолор жүрдү. Андан соң тараптардын жарыш сөзү орун алды.
Кылмыш жаза кодексинин талабына ылайык, айыпталуучуга бир жаза мөөнөтүн берүүнү эске алуу менен мамлекеттик айыптоочу жалпы эсеп менен Келдибековду мүлкүн конфискациялап катуу режимде 10 жылга эркинен ажыратууну суранды.
Өз кезегинде экс-спикердин адвокаттары сөз сүйлөп, коюлуп жаткан күнөөлөр далилденбегенин билдиришти.
"Ахматбек Келдибеков убагында өлкөгө кызмат өтөгөнүн эске албай жатасыңар. Катардагы жаран эмес, өлкөдөгү экчинчи адам болгон. Алты баласы бар. Мамлекеттик айыптоочу ушунун баарын эске алса болмок", — деди адвокат Наталья Чильникина.
Адвокаттар буга чейин Келдибековго 17 жолу кылмыш иши козголуп, кылмыштын курамы жоктугуна байланыштуу токтотулган айтып, бул саясий буйрук экенин билдиришти.
Тараптардын жарыш сөзү бүтүп, Келдибеков өз пикирин айтты.
"Мен мамлекеттен бир тыйын алган эмесмин. Эгерде корупцияга катыштыгым далилденсе жаза өтөөгө даярмын", — деди Келдибеков.
Соттук отурум 11-мартка жылды. Анда соттун чечими чыгары белгилүү болду.
Келдибеков Sputnik Кыргызстан агенттигинин журналистине соттор адилетүү чечим чыгарат деген үмүтү бар экенин билдирди.
"Колдон келген далилдердин баарын көрсөттүк. Жогору жактан буйрук келбейт деп ойлойм. Эгерде андай болсо мени биринчи инстанциядагы сот күнөлүү деп тапмак. Мен соттун адилеттүү чечимине үмүт кылам", — деди Келдибеков.
Ага кылмыш жаза кодексинин 30-беренесинин төртүнчү бөлүгү (кылмышка шериктеш болуу), 303-беренесини биринчи бөлүгү (коррупция), 304-беренесинин төртүнчү бөлүгү (кызматтык абалынан кыянаттык менен пайдалануу) боюнча кылмыш иши козголгон.
Келдибеков жогорудагы айыптар менен 2013-жылы камакка алынган. Биринчи май райондук соту Келдибековду коррупция беренеси боюнча актап, ал эми Москвадагы өкүлчүлүктү ачуу боюнча үч миллион айып пул салган.
