БИШКЕК, 9-мар. — Sputnik. Мындан ары жол кайгуул кызматкерлери көчөдө турбайт деген маалымат жаңылыштык. Бул тууралуу Sputnik Кыргызстан маалымат агенттигине ИИМдин маалымат борборунун жетекчиси Алмазбек Бообеков билдирди.
Жол кайгуул кызматы менен Кайгуул күзөт кызматы бириктирилип, Кайгуул милициясынын башкармалыгы түзүлдү. Буга чейин өкмөттөн Жол кайгуул кызматкерлери мындан ары көчөдө турбайт деп билдиришкен.
"Жол кайгуул кызматкерлери жол эрежесин көзөмөлгө албай отуруп алса, шаарда эмне болот? Алар мурдагыдай эле иштей беришет. Кийин эле шаардын бардык көчөлөрүнө видеокамералар коюлуп калса, жол кайгуул кызматкерлери көчөдө турбай калышы мүмкүн. Бирок, бул келечектин иши", — деп билдирди Бообеков.
Анын сөзү боюнча, жаңы кызматтын негизги максаты — биргеликте жыйынтыктуу иш алып баруу.
"Мындан ары жол кырсыгы болобу, адамга кол салуу болобу эки кызматтын кызматкерлери окуя болгон жерге куралданып барышат. Эки кызмат биригип, бир функцияны аткарып калгандыктан бардык кырдаалга реакция жасашат", — дейт Бообеков.
Ал эми адамга кол салуу, бейбаштык болгон жерге жол кайгуул кызматкеринин кандай тиешеси же жардамы тийиши мүмкүн деген суроого Бообеков бардык милиция кызматкерлеринин бардык багытта билимдери бар экенин айтты.
"Жарандык окуу жайды бүтүп алып эле милиция кызматкери болуу мүмкүн эмес. Алар кайра даярдоочу курстардан өтүшөт. Ал жактан сертификатка ээ болгондон кийин гана ишке алынышат. Атайын курстарда бардык багытта сабактар өткөрүлөт. Буга ылайык алар күзөт кызматында дагы, жол кайгуул кызматын дагы иштей алышат. Мындан сырткары юридикалык билими бар жаран милицияда иштегиси келсе, атайын курстарга барып сертификатка ээ болуу менен кызматка кире алат. Ал эми ИИМдин академиясынан билим алгандар, шыр эле ишке алынат. Себеби, аларга бардык багытта билим берилет", — дейт Бообеков.
Ал кошумчалагандай кайгуул милициясы кызматтык унаа, курал-жарак, атайын жабдуулар менен камсыздалган. Эгер премьер-министр айткан унаалар дагы берилип калса, жетишсиздик жоюлат.
