БИШКЕК, 4-мар. — Sputnik. ИИМдин 5-башкы башкармалыгы бажы кызматынын өкүлдөрү мамлекетке кирген автоунааны каттоодо кызматтык абалынан кыянаттык менен пайдаланган учурду аныктаган. Бул тууралуу Ички иштер министрлигинин маалымат кызматы билдирди.
Тактап айтканда "Тойота" үлгүсүндөгү автоунааны каттоодо одоно мыйзам бузуу орун алган.
Иликтөө учурунда аныкталгандай, бажы кызматынын өкүлдөрү 2001-жылы чыккан "Тойота-Авенсис" үлгүсүндөгү автоунааны 2003-жылы чыккан деп каттаган.
Андан тышкары мамлекеттик чек арадан өткөн жарандарды жана автотранспортту каттоонун тартиби бузулганы аныкталган. Алар автоунааларды төмөндөтүлгөн тариф менен каттап, мамлекеттик бюджетке олуттуу суммадагы акча түшпөй калган. Учурда келтирилген зыян иликтенүүдө.
Аталган фактылар боюнча Кылмыш жаза кодексинин шалаакылык, документтерди жасоо жана алдамчылык беренелери боюнча кылмыш иши козголду.
