БИШКЕК, 4-мар. — Sputnik. Жол эрежелерин бузгандыгы үчүн үйдүн почтасына келген айып тууралуу билдирүүнү көз жаздымда калтырган айдоочуга кошумча туум чегериле турганын ИИМ билдирди.
Сокулукта марттан баштап жол эреже бузгандарды сүрөткө жана видеого каттоо системасы иштей баштады. Эми айдоочуларга жол эрежесинин бузулушу боюнча унаанын сүрөтү, мамлекеттик номери жана кандайча бузгандыгы айтылган токтомдун копиясы жиберилет.
Административдик жоопкерчилик боюнча кодекске ылайык, айып пулду унаанын ээси төлөйт. Ал сот аркылуу эреже бузулган маалда рулду башкарып бара жаткан адамдан айып пулдун көлөмүн өндүрө алат.
Акча квитанция колго тийген 30 күндүн ичинде төлөнүшү керек. Мөөнөтүндө төлөнбөсө, мыйзам боюнча унаа ээсине туум чегериле баштайт. Кошумча акча ар бир күн үчүн айып пулдун 10 пайызы менен эсептелет.
