БИШКЕК, 2-мар. — Sputnik. Ысык-Көл облусунун Тоң районунда эшектерди уурдап, алардын терисин сыйрып жүргөн жарандар райондук милиция тарабынан кармалды. Бул тууралуу Ысык-Көл ОИИБдин маалымат катчысы Сталбек Усубакунов билдирди.
Милициянын маалыматына ылайык, кармалган жарандар негизинен Тогуз-Булак айылындагы эшектерге аңчылык кылып келишкен. Күндүзү эшектерди акмалап, түндө аны уурдап, айыл четине алып чыгып союп, терисин сыйрып жүрүшкөн.
"Терини 2500 сомдон 3500 сомго чейин сатып келишкен. Учурда алар 15 жолу ушундай уурулукка барганын моюнга алышты. Жалпысынан 18 эшек уурдашкан", — деп айтылат облустук ички иштер башкармалыгы тараткан билдирүүдө.
Учурда тергөө иштери жүрүп, алардын башка кылмыш иштерине тийиштиги бар-жогу текшерилүүдө.
Февраль айынын аягында Жалал-Абад облусунун Аксы районунда дагы эшектерди уурдап, анын терисин сыйрып жүргөндөр кармалган.
Эшек чуусу 2015-жылдын башында Сокулук районундагы Ак-Жол айылында эшек союлуп, эти сатылып жатканы боюнча маалыматтан башталган.
Андан сырткары эшектин терисин сыйруу боюнча фактылар өлкө аймагында дайыма катталып келет.
