БИШКЕК, 29-фев. — Sputnik. Борбор калаада жалаң Кыргызстанда жасалган буюмдар сатылчу дүкөн ачылганын анын ээси Гүлнара Качаганова билдирди.
Анын айтымында, дүкөн февраль айынын аягында ачылып, кыргызстандык дизайнер-мастерлердин колунан жаралган зер буюмдардан тартып, адеми кийимдерге чейин коюлган.
Качаганова чакан дүкөндүн максаты кыргызстандык кол өнөрчүлөрдүн буюмдарын сатуу экенин айтат.
"Мага окшогон чыгармачыл адамдар колунан чыккан буюмдарын сата албай келет. Андыктан биздин максат — жергиликтүү кол өнөрчүлөрдүн эмгегин башкаларга көрсөтүү", — дейт ал.
Качаганова бул жерге кийим-кече, зер буюмдардан тышкары Кыргызстанда жасалган азык-түлүктөр дагы келечекте сатыла турганын айтат.
"Келечекте бал, курут, сүзмө сыяктуу азык-түлүктөрдү да коебуз. Азырынча сувенирлер кийимдер сыяктуу бузулбаган нерселерде сатыкка койдук", — дейт ал.
Андан сырткары дүкөндүн ачылышын "Өзүбүздүкүн сатып ал" коомдук уюмунун жетекчиси Бакыт Дегенбаев биринчилерден болуп колдогонун ал кошумчалады.
