БИШКЕК, 29-фев. — Sputnik. Кыргызстандын дзюдо боюнча чемпионатынын алдыңкы орундарынын баарын уландар арасында Бишкек шаарынын спортчулары ээлесе, кыздар арасында Ысык-Көлдүн кыздары алганын аталган спорттун түрү боюнча федерация билдирди.
Биринчилик 26-27-февраль күндөрү Сокулуктагы "Динамо-Темирлан" спорт комплексинде өттү.
"Быйылкы чемпионат өлкөнүн булуң-бурчунан рекорддук сандагы спортчуларды чогултту. Мелдешке катышуу үчүн 437 спортчу келген", — деп айтылат билдирүүдө.
Уландар арасында бишкектик спортчулар алдыга озду. 50 килограммга чейинки салмак категориясында Кумуркулов биринчи болсо, 55 килограммга чейинки категорияда Прошин, 60 килограммга чейинки чен көрсөткүчтө Сансанза, ал эми 66га чейинки категорияда Мырзаев алдыңкы орунду ээледи. Кийинки категорияда Турусбеков мыкты болсо, Жумали уулу 81 килограммга чейинки категорияда алдыга чыкты. 90 килограммга чейинки салмакта Амиржанов биринчи болсо, +90 категориясында Сарбатов алдыңкы орунду ээледи.
