БИШКЕК, 26-фев. — Sputnik. "Сулайман-Тоо" улуттук тарыхый-археологиялык музей-комплексинин аймагындагы "Айдар-Ата" кафеси бүгүн буздурулуп, дагы бир нече объектилердин иши сотко жөнөтүлдү. Бул туурасында аталган комплекстин директору Абдраим Тургунбаев Sputnik Кыргызстан агенттигине билдирди.
"Сулайман-Тоонун" аймагындагы мыйзамсыз объектилерди аныктоо иштери улантылып, бир нечесинин иши сотко жиберилди. Алардын катарына "Ош ордо" жана газ чарбачылыгы менен алектенген объектилер кирет", — деп билдирет Тургунбаев.
"Айдар-Ата" кафесин сүрдүрүү чечими 2015-жылдын 8-ноябрында Ош шаардык соту тарабынан чыгарылган. Ал чечим бул жылдын 25-январында Ош облустук соту тарабынан күчүндө калтырылган.
Ош шаарынын муниципалдык менчик башкармалыгынын юридика бөлүмүнүн башчысы Канышай Нарынбаеванын айтымында "Айдар-Ата" кафесинин ээсине эскертүү берилген.
"Айдар-Атанын ээси Казат Раимкул уулуна кафени өзү буздуруп алуусун айтып, убакыт бергенбиз. Бирок, ал талапты аткарган жок. Буга ылайык, кафени буздурууга муниципалдык башкарма кийлигишүүгө аргасыз болду", — дейт Нарынбаева.
Анын айтымында, Сулайман-Тоонун аймагындагы "Айдар-Ата" кафесине байланыштуу чуу беш жылга созулуп, акыры быйыл сүздүрүлдү. 2013-жылга чейин кафе Мая Айдарова аттуу жаранга таандык болгон, кийин 2013-жылы ал 150 миң сомго Казат Раимкул уулуна сатылган.
