БИШКЕК, 26-фев. — Sputnik. Тергөө учурунда кылмышка шектүүнүн 7-кабаттын балконунан секирип кеткени боюнча кылмыш иши козголду. Бул тууралуу Башкы прокуратуранын маалымат кызматы билдирди.
6-февралда Бишкек шаарындагы "Чыгыш-5" кичи районунда шаардык милиция шектүү жаранды окуя болду деген жерге алып келишкен. Бул учурда ал жетинчи кабаттан секирип кетип, каза болгон.
"Текшерип жаткан прокурор шектүү жарандын тергөөчүнүн уруксаты жок мыйзамсыз кармалганын аныктаган. Аны милиция кызматкерлери үч сааттай кармап, тергөөчүсү жок эле иликтөө иштерин жүргүзгөн", — деп айтылат башкы көзөмөл органы тараткан билдирүүдө.
Ошондой эле, шектүүнү окуя болгон жерге Ленин райондук ИИБдин кызматкери алып келген, бирок ал аймагы боюнча "Чыгыш-5" аймагы Свердлов районуна карайт.
Милиция кызматкерлери өз көрсөтмөсүндө кармалган жаран Ленин районунун аймагында дагы кылмыш жасаган деп шектелип жүргөнүн билдиришкен.
Азырынча кылмыш иши козголгон милиция кызматкерлери кармала электигин, тергөө иштери жүрүп жатканын Башкы прокуратурадан маалымдашты.
