БИШКЕК, 26-фев. — Sputnik. Кыргызстан Россия президенти Владимир Путин менен АКШ жетекчиси Барак Обаманын ортосундагы 27-февралдан тарта ок атууну токтотуу боюнча чечимин колдоого алат. Бул тууралуу Тышкы иштер министрлиги билдирди.
Дүйшөмбү күнү АКШ менен Россиянын сирия боюнча биргелешкен билдирүүсү жарыяланып, анда 27-февралдан тартып жарашуу күчүнө кириши керектиги каралган. Бирок бул макулдашуу БУУ тарабынан террористтик деп табылган "Ислам мамлекети", "Жебхат ан-Нусра" жана башка топторго тиешелүү болбойт.
ТИМ Сирияны колдоо боюнча бардык өнөктөш өлкөлөр жана бул мамлекеттин эли жетишилген макулдашуунун шартын аткарып, бардык маселелерди эл аралык укук жана БУУ уставынын негизинде сүйлөшүү жолу менен гана чечерине ишеним артат.
Сирияда 2011-жылдын мартынан бери куралдуу кагылыш жүрүп, анын кесепетинен 220 миңден ашуун адамдын өмүрү кыйылган. Өкмөттүк күчтөргө ар кандай топторго таандык согушкерлердин топтору каршылык көрсөтүүдө. Алардын ичинен эң активдүүсү катары "Ислам мамлекети" менен "Жебхат ан-Нусра" топтору белгиленген.
