БИШКЕК, 23-фев. — Sputnik. Россия менен АКШнын дүйшөмбү күнү жасаган билдирүүсүнө ылайык, үстүбүздөгү жылдын 27-февралынан тартып Сирияда өкмөттүн аскер күчтөрү менен оппозициянын аскердик топторунун ортосунда жарашуу ишке ашырылышы керек. Ал эми БУУ тарабынан террористтик деп табылган "Ислам мамлекети" (ИМ), "Жебхат ан-Нусра" жана башка топторго чабуул улана бермекчи.
Сириядагы жарашуу тууралуу Россия менен АКШ президенттери телефон аркылуу сүйлөшүшкөн. Натыйжада РФ башчысы Владимир Путин согуштук аракеттерди токтотуу Сириядагы кандуу кагылыштарга чекит коёрун белгиледи.
"Америкалык тарап менен бир пикирге келүү Сириядагы кыйын кырдаалды жөнгө салууга өбөлгө болот. Көп жылдан бери келе жаткан кан төгүүнү токтотууга шарт түзүлдү", — деди президент.
АКШ лидери Барак Обама учурда сириялык режим менен куралдуу оппозициядан оң жооп алуу күтүлүп жатканын, ошондой эле жетишилген макулдашууну бардык тараптар абийирдүүлүк менен аткарарына ишеним артты.
Россиялык президенттин маалымат катчысы Дмитрий Песков АКШ менен РФтин Сирия боюнча чечими Сауд Аравия жана Катар лидерлери менен болгон эки тараптуу сүйлөшүүлөрдүн натыйжасында макулдашылганын белгиледи. Ал эми АКШнын мамдепартаментинин өкүлү Марк Тонер кечээ мамкатчы Жон Керри Франция, Германия жана Сауд Араваиясынын ТИМ башчылары менен телефон аркылуу маектешкенин билдирди.
Жарашуу тууралуу макулдашуу бардык тараптарга, анын ичинде Түркияга да тиешелүү экени баса белгиленүүдө.
Жарашуу демилгесине Сириянын мамилесин бир беткей деп айтуу кыйын — башкы оппозициялык топ аталган макулдашууну гуманитардык "шарттар" аткарылган учурда гана колдой турганын билдирсе, сүйлөшүү боюнча жогорку комитет курчоону алуу, түрмөдөгүлөрдү бошотуу жана жөнөкөй жарандарга ок чыгарууну токтотууну талап кылууда.
Ал арада Сирия президенти Башар Асад 13-апрелде парламенттик шайлоо өткөрүү боюнча жарлыкка кол койду. Бул кандуу кагылыш башталгандан бери экинчи шайлоо болмокчу.
Эскерте кетсек, Сирияда 2011-жылдын мартынан баштап согуш жүрүп, натыйжада БУУнун маалыматы боюнча 220 миңден ашуун адам каза болгон. Өкмөттүк күчтөргө ар кандай куралдуу уюшкан топторго тиешелүү согушкерлер каршылык көсөтүүдө. Эң эле жигердүүлөрүнөн болуп "Ислам мамлекети" менен "Жебхат ан-Нусра" террористтик топтору эсептелинет.
