БИШКЕК, 21-фев. — Sputnik. Ош шаарынын мэриясы 23-февраль — Мекенди коргоо күнүнө карата жергиликтүү журналист кыз-келиндер арасында волейбол боюнча мелдеш өткөрдү. Бул туурасында Sputnik Кыргызстан маалымат агенттигине Ош мэриясынын маалымат кызмат билдирди.
Бул мелдешке Ош шаарында жайгашкан "ЭлТР", "7-канал", "Ош Пирим", "Ош ТВ" жана "Ынтымак" телеканалдарынын журналист кыздары катышты.
"Бүгүнкү мелдеште "ОшТВ" биринчиликти алса, "ЭлТР" командасы экинчи, ал эми "Ынтымак" телеканалынын кыздары үчүнчү орунга татыктуу болду. "Ош Пирим" төртүнчү, "7-канал" бешинчи орунду ээледи",— деп билдиришти мэриянын маалымат кызматынан.
Ош мэриясынын кызматкери Жылдыз Бурканова 8-мартта Аялдардын эл аралык майрамына карата, жергиликтүү журналист жигиттер арасында футбол боюнча турнир өткөөрүн кошумчалады.
Бүгүнкү оюнда жеңүүчүлөр мэрия тарабынан ноутбук жана башка баалуу белектер, Ардак грамоталар менен сыйланышты. Мыкты оюнчу, мыкты чабуулчу, мыкты коргоочу, мыкты күйөрман номинациялары боюнча дипломдор берилди.
