БИШКЕК, 18-фев. – Sputnik. Анкаранын борбордук аймагында банкоматтан акча алып жатканда жарылган катуу добуш чыкты. Шок абалына түшүп, кайда качаарымды билбей калдым. Бул тууралуу Sputnik Кыргызстан агенттигине 23 жаштагы кыргыз студенти Ибрагим Губаров билдирди.
17-февралда Түркиянын парламенти менен Башкы штабынын аймагына жакын жерде болгон. Светофорго аскерлерди ташып келе жаткан транспорт колоннасы токтогон учурда мина коюлган автоунаа жарылып, анын кесепетинен 28 адам курман болду, алардын 27си аскер адамдары экендиги маалымдалды.
"Жардыруунун үнү чыкканда элдин баары чуркап, кача баштады. Шок болуп, эл чуркаган жакка же башка тарапка качуу керектигин билбей калдым", — дейт студент Губаров.
Анын айтымында, эл жыгылып бири-бирин тепселеп кетпеши үчүн түрк жигиттери менен биргеликте ар тарапка чуркагандарды токтотконго аракет жасашкан.
"Адегенде кичине кыз жерге жыгылып калды, эл тепселеп кетпесин деп аны тургузуп, жардам бердик. Үрөйү учуп качкандарды тынчтандырууга аракет кылдык ", — деп айтып берди ал.
Анкарадагы кыргыз диаспорасынын башкы катчысы Адилет Абишовдун Sputnik Кыргызстан агенттигине билдирүүсү боюнча, жардыруудан кийин кыргызстандыктар тарабынан чалуулар көп болгон.
"Кыргызстандан жакындарын, тааныштарын негизи эле боордоштору тууралуу сурап чалгандар көп болду. Бактыга жараша, жабыркагандардын арасында кыргыз мекендештерибиз болгон жок", — деп билдирди Абишов.
Анын айтымында Анкарада буга чейин да мындай терактылар болгон. Айрым кыргыз студенттери корккондуктарынан сабакка бир нече күн барбай калган учурлар кездешкен. Бирок, окуусун токтотуп, өлкөнү таштап кеткендер болгон эмес.
