Москвадан башка улуттун өкүлү менен жүрөсүңөр деп кыздарды кысмакка алгандар изделүүдө

БИШКЕК, 16-фев. — Sputnik. "Эмне үчүн башка улуттун өкүлдөрү менен көңүл ачып жүрөсүңөр" деп кысмакка алынган кыздар изделип жатат. Бул туурасында Кыргызстандын Ички иштер министрлигинин Москвадагы расмий өкүлү Аскат Алиев Sputnik Кыргызстан маалымат агенттигине билдирди.

Белгилей кетсек, интернетке "башка улуттун өкүлдөрү менен эмнеге көңүл ачып жүрөсүңөр" деген балдар эки кызды кысмакка алып жатканы боюнча видео кечээ кечинде тараган. Видеодо кыздардын бирөөсү "эжеме тийбегиле" деп балдардан суранып жаткан үнүн угууга болот.

Алиевдин айтымында, окуя Москва шаарындагы жаңы ачылган кафелердин биринде болгон.

"Биз окуя кайсы жерде болгонун тактадык. Учурда кыздардын ким экенин тактап жатабыз. Бул боюнча социалдык баракчабызга дагы билдирүү тараттык. Эгер кыздардан арыз келип түшсө, тергөө органдары алардын аракетине юридикалык баа берет", — дейт ал.

Алиев ошондой эле, былтыр Москва шаарында болгон зордуктоо фактысы боюнча сот иши алигиче жүрүп жатканын кошумчалады. Анда кызды зордуктаган бала анын бетин видеого тартып алып, интернетке чыгарып жиберем деп коркуткан. Андан сырткары Екатеринбургдан баткендик кыздын токойдон кордолгону боюнча кылмыш иши ачылып, кыз толук көрсөтмө бере албаганы үчүн иш аягына чыкпай калды. Кыз психикалык диспансерде каттоодо турганы да аныкталганын Алиев кошумчалады.

ИИМдин Москвадагы расмий өкүлүнүн айтымында, кордолгон кыздардан арыз келип түшпөгөндүктөн көпчүлүк окуя кайда болгону билинбей калууда.