БИШКЕК, 12-фев. — Sputnik. Жаңы төрөлгөн ымыркай кызын 20 миң сомго сатып жиберген аял кармалганын ИИМ билдирди.
Маалыматка ылайык, төрөгөнгө чейин 26 жаштагы келин Бишкектеги жаңы конуштардын биринде жашап, базарда короо шыпыргыч болуп иштеп келген. Аялдын буга чейин эки баласы болгон. Күйөөсү менен мал багып күн кечирген үй-бүлө үчүн үчүнчү перзент оорчулук келтиргендиктен аны сатып жиберүүнү чечип, бул тууралуу жакындарына, тааныштарына айтышкан.
Укук коргоо органдарынын кызматкерлери сатылган бала чоңоюп жаткан үй-бүлөнү да табышкан. Белгилүү болгондой ымыркайды Бишкектин 42 жаштагы тургуну багып алган. Алдын ала маалымат боюнча наристе жакшы шартта жашап жатканы белгилүү болду.
Учурда бул боюнча бардык материалдар кийинки иликтөө иштерин үчүн Биринчи Май РИИБ тергөө бөлүмүнө берилди.
