БИШКЕК, 26-янв. — Sputnik. Ош облусунда жаңы төрөлгөн ымыркайын 15 миң сомго сатып жиберген кыргызстандык жаран кармалганын Sputnik Кыргызстан агенттигине ОИИБ билдирди.
Милициянын маалыматы боюнча, окуя өткөн жылдын соңунда болгон. 27 жаштагы аял Ош шаарынданы төрөт үйлөрүнүн биринде көз жарып, үч күндөн кийин кызын Кыргызстанда төрөлүп Россиянын жарандыгын алган 36 жаштагы аялга сатып жиберген.
"Эне акчага абдан муктаж болуп жатканын, ал эми кызды сатып алган аял бала багып алууга ниеттенип жүргөнүн айтып берди. Ымыркайды сатып алгандан кийин россиялык жаран башка төрөт үйүнөн жасалма справканын негизинде туулгандыгы тууралуу күбөлүк алууга жетишкен", — дешти башкармалыктан.
Учурда бул иш боюнча бардык материалдар чогултулуп, Кылмыш жаза кодексинин 124 (Адам сатуу) жана 350 (Документтерди жасалмалоо) беренелеринин негизинде кылмыш иши козголду.
Эки аял тең үй камагына алынган. Милиция ымыркай тергөө маалына россиялык жарандын колунда калганын белгиледи.
