БИШКЕК, 11 фев. — Sputnik. Борбордо билим берүүчү жана агартуучу "Биз орус тили менен өсөбүз" аттуу акция өткөрүлөт. Бул тууралуу Россиянын Кыргызстандагы илим жана маданият борборунун маалымат кызматынан билдиришти.
Ишчара бейшемби күнү саат 15:00дө кароосуз калган балдардын реабилитациялык борборунда өткөрүлөт.
Аталган ишчара балдар акыны болгон Агния Бартонун 110-жылдык юбилейине карата өткөрүлөт.
Реабилитациялык борбордогу кенже жаштагы балдарга Кыргыз-орус славян университетинин студенттери менен "Саторис" мектебинин окуучулары Агния Бартонун балдарга арналган белгилүү ырларын көркөм окуп беришет. Мындан сырткары оюндар дагы уюштурулат.
Ал эми Россиянын илим жана маданият борбору тарабынан балдарга китеп менен таттуулар таркатылат. "Кыргызсоюзпечать" басылмасынан чыккан кыргыз жана орус тилдериндеги жомок китептери дагы белек катары берилери маалыматта белгиленет.
Мындай ишчара экинчи жолу өткөрүлүп жатат.
