БИШКЕК, 29-янв. — Sputnik. Президент Алмазбек Атамбаев Бишкек — Ош унаа жолундагы Көк-Арт көпүрөсүн реконструкциялоо долбоорун каржылоого гранттык макулдашууну ратификациялоо боюнча мыйзамга кол койгонун өлкө башчынын маалымат кызматы билдирди.
Макулдашуу кыргыз өкмөтү менен Япониянын JICA агенттиги тарабынын 2013-жылы түзүлүп, мыйзамды Жогорку Кеңеш былтыркы жылдын соңунда кабыл алган. Көк-Арт дарыясына жаӊы көпүрө салуу үчүн 1 миллиард 196 миллион йен бөлүнмөкчү.
Келишимде аталган аймактын инфраструктурасын жакшыртуу, өлкө ичиндеги үзгүлтүксүз унаа байланышын камсыздоо каралган.
Аталган мыйзам расмий жарыялангандан кийин 10 күндөн соң күчүнө кирет.
