БИШКЕК, 20-янв. — Sputnik. Ош шаарында Исанов жана Ленин көчөлөрүн бириктирген көпүрөнүн курулуш иштери башталды.
Мэрия көпүрө пайдаланууга берилсе, шаардагы унаа тыгындары азайып, тургундарга ыңгайлуу шарттар түзүлөт деген ойдо.
Көпүрөнүн узундугу 36 метр, туурасы 22 метрди түзөт. Тендердик баасы 43,6 миллион сом.
Шаар мэри Айтмамат Кадырбаев көпүрөнү сегиз айда бүткөрүүнү пландап жаткандыгын айтты.
"Курулуш мөөнөтү бир жыл, бирок биз ушул жылдын сентябрь айына бүткөрүүнү пландап жатабыз. Учурда студенттер шаарчасы аталган "Түштүк –Чыгыш" кичи районунан "Резиденция" районуна өтүү үчүн бир топ жерлерди айланууга туура келет. Көпүрө бүтсө шаардын эки аймагын бириктирип, унаа тыгындары азаят", — деди Кадырбаев.
Шаар башчысы тиешелүү жетекчилерге, куруучуларга эң башкысы курулуштун сапатына маани берүүнү тапшырды.
