БИШКЕК, 27-янв. — Sputnik. Кыргызстандын биринчи президенти Аскар Акаев агасына топурак салуу үчүн келе албайт. Бул тууралуу Акаевдердин үй-бүлөсүнө жакын булактан белгилүү болду.
Асанкул Акаев кечээ, 26-январь күнү Бишкекте Президенттин иш башкармалыгынын атайын ооруканасынада 77 жаш курагында каза болду. Маркумдун сөөгү эртең өзүнүн туулуп-өскөн айылы Кемин районундагы Кызыл-Байрак айылына коюлат.
Булактын айтымында, Аскар Акаев учурда Францияда илимий иштери менен жүрөт.
"Аскар Акаевге агасынын каза болгону тууралуу кабар айтышты. Мен анын келер-келбесин так айта албайм. Бирок шарт-жагдайга байланыштуу келе албай калышы мүмкүн. Балким балдарынан бирөө-жарымы келер", — деди маектеш.
Аскар Акаев Кыргызстандан 2005-жылкы окуядан кийин чыгып кеткен, учурда Москва шаарында жашап мамлекеттик университетте сабак берет.
Мындан тышкары, 2008-жылдын июнь айында Аскар Акаев анын талапкерлигин 1990-жылы президенттикке көрсөткөн улуу жазуучу Чыңгыз Айтматовдун зыйнатына да келе албай калган.
2015-жылдын март айында президенттин кеңешчиси Фарид Ниязов Акаев кылмыш иштери боюнча бир катар суроолорго жооп бериши керектигин билдирген. Ага чейин мурунку башкы прокурор Аида Салянова эгер Аскар Акаев Кыргызстанга келсе, суракка алынарын, анын жакындарынын тиешеси бар кылмыш иштер жабыла электигин маалымдаган.
Асанкул Акаев 1939-жылы жарыкка келген. Эки ирет Жогорку Кеңештин Эл өкүлдөр жыйынына депутат болуп шайланып келген.
