БИШКЕК, 25-янв. – Sputnik. Дүйшөмбү күнү Тажикстандын ички иштер министри Рамазон Рахимзода "Жамаат Ансорулло" террордук тобунун жетекчиси Амриддин Табаровдун каза тапканын расмий жарыялады.
Маркум Амриддин Табаров өз чөйрөсүндө Мулло Амриддин деген ысым менен таанымал болгон.
"Мулло Амриддин Афганистандын аймагындагы кармашуулардын биринде каза тапкан", — деп ичики иштер министри Дүйшөмбү шаарында өткөн маалымат жыйынында билдирди.
Буга чейин согушкер Пакистанда каза болгону айтылып келген. Бирок, маалымат расмий түрдө такталган эмес. Табаров Афганистандын Тажикстан менен чектешкен Тахор провинциясына 2013-жылы келгени тууралуу да маалыматтар таркаган.
Тажиктер аралык тынчтык келишимине 1997-жылы кол коюлган. Бирок, Табаров документтеги талаптарга макул болбой үй-бүлөсү менен кошо өлкөдөн чыгып кеткен.
ИИМдин билдириши боюнча Табаров этникалык тажиктерден турган "Ансорулло" аттуу террордук топ түзүүгө жетишкен. Ал "Аль-Каида" террордук тобу тарабынан каржыланып турган.
Тажикстандын Жогорку сотунун чечими менен 2012-жылы "Жамаат Ансорулло" тобунун ишмердүүлүгүнө тыюу салынган. Мындан сырткары Улуттук коопсуздук комитетинин билдирүүсү боюнча террордук кыймыл Дүйшөмбү шаарында бир нече жолу чабуул жасаганга аракет жасашкан.
