БИШКЕК, 25-янв. — Sputnik. Борбордук "Ала-Тоо" аянтындагы мамлекеттик желек жайгашкан №1 посттон өзүн өзү сүрөткө тарткан учурлар көбөйүп кеткендиктен, Улуттук гвардиянын маалымат кызматынын жетекчиси Таалай Мырзабаев шаар тургундары менен конокторуна кайрылуу жолдоду.
"Урматтуу шаардыктар жана борбор калаанын меймандары, кароолдун алмашуусуна кызыгуунун көп экенине карабастан, тосмодон өтүүгө, ага жөлөнүүгө же кырына чыгууга тыюу салынат. Бул №1 посттун чек арасы болуп эсептелет", — деди ал.
Мырзабаев "Ала-Тоо" аянтына келгендердин баарын посттун чек арасына сыйлоо менен мамиле кылып, кароол кызматынын уставын бузбоого жана ШИИБнын кызматкерлери жокто эреже бузгандарга эскертүү берүүгө чакырды.
