БИШКЕК, 19-янв. — Sputnik. Кыргызстандын жаштар командасы Шериктештик кубогунда молдовалык футболчулардан утулуп калды.
Тайпалык этаптын экинчи оюну шейшемби күнү Санкт-Петербург шаарында өттү. Командалар биринчи танаписке эсепти ачпай чыгышты. Экинчи таймдын башталышында молдовалыктар сол жактан гол киргизүүгө жетишти. Кийинки топту атаандаш оюн бүтө жаздап калганда киргизди. Беттешүү 0:2 эсеби менен аяктады.
Биринчи оюнда кыргызстандыктар белорустардан күчтүү экенин далилдешкен (1:0). Үчүнчү жолкусунда кыргыз командасы казактар менен беттешип, ал 21-январда өтөт.
1993-жылдан баштап турнирге улуттук чемпионаттын жеңүүчүлөрү болгон мурунку Советтер Союзу республикаларынын футболдук клубдары катышып келет. 2012-жылдан тарта турнирдин тартиби өзгөрүп, мамлекеттердин жаш футболчулары ойной баштаган. 2012-2013-жылдары Кубок россиялыктарга тийсе, 2014-жылы украиналыктар мыкты аталган.
2015- жылдын турнирин оюнга конок катары чакырылган Түштүк Африка Республикасы жеңип алган.
