БИШКЕК, 13-янв. — Sputnik. "Республика — Ата-Журт" фракциясы жаңы ант берип, депутаттардын катарын толуктаган Жыргалбек Саматовду фракциядан чыгарып салганын билдирди.
2015-жылдын 4-октябрында өткөн парламенттик шайлоодон бери БШК менен мандат алуу боюнча чыр-чатагына чекит коюлуп, соттун чечими менен мандатка жеткен Саматов бүгүн парламентте ант берген.
Фракциянын маалыматына ылайык, жаңы депутат Россиянын мамлекеттик кызматтарынын жасалма документтерин пайдаланып, өзүнүн кош жарандуулугун жашырууга аракет кылган.
"Саматов кош жарандуулугун жашыруу менен жеке кызыкчылыгын көздөп, жалпы кызыкчылыкка карама-каршы келет. Мындай аракеттер "Республика — Ата-Журт" фракциясынын максаты менен шайкеш келбейт", — деп айтылат билдирүүдө.
Өткөн жылдын 7-декабрында БШК соттун чечимин орундатып, Саматовго мандат берген. Бирок бир жумадан кийин анын кош жарандуулугу боюнча Федералдык миграциялык кызматтын катын тастыктоо зарылдыгына таянуу менен мандатынан ажыраткан. Анда Саматов ант берүүгө үлгүргөн эмес. Бирок, талапкердин доо арызынын негизинде чыгарылган соттун чечими менен Саматов акыры депутат болуп келди.
