БИШКЕК, 6-янв. — Sputnik. Учурда сегиз миңге жакын кыргызстандык травматикалык тапанча көтөрүп жүрөт. Өткөн жылы травматикалык курал колдонуп жасалган 15 кылмыш катталган.
Бүгүн парламентте курал жөнүндө мыйзамга өзгөртүү, толуктоо киргизүүнү караган мыйзам долбоору талкууланып, ал биринчи окууда добуш берүүгө жөнөтүлдү.
Ички иштер министринин орун басары Курсан Асановдун айтымында, куралдын бул түрү КР Кылмыш-жаза кодексинин 241-беренесиндеги дүрмөтсүз жана газдуу куралдардын катарына кошулуу менен, аны мыйзамсыз жүгүрткөндүгү үчүн кылмыш жоопкерчилиги каралган.
"Травматикалык куралды аттыруу ишин жүргүзүү зарылчылыгы келип жетти, ал эми окуя болгон жерден табылган гильзаны травматикалык куралга идентификациялоо үчүн ИИМдин ок гильзотекасына киргизүү зарыл", — деди Асанов.
Талкуу жүрүшүндө мыйзам кабыл алынса, травматикалык куралды колдонуу менен жасалган кылмыштардын жана укук бузуулардын өсүшүнө бөгөт боло турганы, арбалет, согуштук жаа сындуу куралдарды да травматикалык куралдардын курамына киргизүү зарылдыгы белгиленди.
