БИШКЕК, 4-янв. – Sputnik. Анкара Россиянын киргизген чектөөлөрүнөн улам анын үстүнөн Дүйнөлүк соода уюмуна кайрылууга даярданып жатканын Түркиянын экономика министри Мустафа Элиташ Daily Sabah гезитинен билдиргенин РИА Новости жазып чыкты.
Анын айтымында, учурда далилдер чогултулуп жатат.
"Биз эл аралык сотто бардык жабырлануучулардын укугун коргойбуз… Соода адеп-ахлакка негизделиши керек", — деди саясатчы.
Россия тарабынан киргизилген чектөөлөрдөн улам Түркиянын азык-түлүк жана туризм тармагы оор жоготууларга учуроодо. Басылма Анкара товарларын Кения, Нигерия жана башка Африка өлкөлөрүнө экспорттоого аракет кылып жатканын жазат.
Россия менен Түркиянын мамилеси Су-24 учагынын Сириянын аймагында атып түшүрүлүшүнөн кийин солгундап кеткен. Владимир Путин мындай кадамды "аркадан урулган бычак" деп баалаган.
Түркияга карата Россиянын атайын экономикалык чектөөлөрү 1-январдан баштап күчүнө кирди. Мында түрк продукциясынын өлкө аймагына киришине тыюу салынып, чартердик авиакаттамдар жоюлган. Визасыз режим токтотулуп, түркиялык жарандарды Россияда жумушка алууга тыюу салынган. Мындан тышкары, Путин Россияда Түркиянын юрисдикциясындагы ишкана-компаниялардын ишмердүүлүгүн токтотуу же чектөө киргизүүнү тапшырган.
