БИШКЕК, 03-янв. — Sputnik. Жыл ичинде бир топ окуяларга таңгалдык, сындадык же таасирленип, суктандык, кээ бирлеринде көзүбүзгө жаш айланды. Алардын ичинде төбө чачты тик турган окуялар да болду. Sputnik Кыргызстан биздин мекендештердин колу барган жагымсыз окуяларды тизмектеп чыкты.
1. Шаардык милиция 15-февралда 35 жаштагы англис тилинин мугалими кармалгандыгын билдирди. Андан тартип сакчылары үч жаштагы уулу менен төрт жаштагы кызын бычактап салган деп шектенип жаткандыгын айтышты. Кийинчерээк окуянын майда-чүйдөсүнө чейин иликтей келгенде, аял мындай ыкма менен балдарын "тынчтандырып, сооротууну" каалагандыгын айтып берген. Балдарына кол салаар алдында аларга уктатуучу дары берген.
2. Кыргыз тилинде көп колдонула бербеген орусча "дрыщ" сөзү Адилет Жунусов аттуу "азаматка" "арналып" колдонула баштады. Бул ат ага капыстан эмес, социалдык тармакка тарап кеткен видеодон кийин жабышты да калды. Ал видеодо Жол кайгуул кызматынын инспекторлору айдоочудан пара талап кылып жатканы тартылган эле.
Кийин инспекторлор менен Жунусовго карата кылмыш ишин козгошкон. "Дрыщка" эркинен 1,5 жыл ажыраткан өкүм чыккан.
3. Август айында "Чыгыш-5" кичи районунун жашоочулары желим баштыкка салынган эркек кишинин денесинин бөлүктөрүн тапкан. Тергөөчүлөр баштыктагы дене мүчөлөрү 34 жаштагы Эрлан аттуу киши экендигин аныкташкан. Кылмыш кылган деп шек жараткан адамды дароо табышкан. Ал… 25 жаштагы өзүнүн аялы болуп чыккан. Милиция Айдай Медициналык Академияда окуурун, эки баланын энеси экендигин маалымдады. Күйөөсүн жиликтеп салган Айдай ар дайым анын ур-токмогуна кабылып келгендигин айтып берген.
4. Октябрь айында Бишкек шаарына жакын жайгашкан №50 абактан качып, бир нече кишилерди өлтүрүп кеткендер туурасында кеп кылбаган киши калган жок. Кандуу окуя 11-октябрдан 12сине оогон түнү болуп, кылмышкерлер күзөттө турган төрт кызматкерди кошо өлтүрүп кетишкен. Жабырланган күзөтчүлөрдүн дагы бирөө эки күндөн кийин ооруканадан көз жумган. Ал эми абактан качкандардын бешөөсү ошол эле түнү беш мүнөткө жетпей кармалган. Дагы төртөө 10 күн аралыгында колго түшүп, акырында бирөө гана тирүү калган. Ал эми алардын акыркысынан болгон Алтынбек Итибаевди колго түшүрүү учурунда, ИИМдин атайын даярдыктагы бир кызматкери курман болуп, атайын операция жүрүп жаткан үйдүн эки жашоочусу каза тапты.
5. Бишкектин милициясына 10-декабрда кайрылган аял боздогон тейде, биринчи класста окуган уулу Даниэлди уурдап кетип, 150 миң сом талап кылгандыгын айтып берген. Тартип сакчылары Жалал-Абаддык Майрам аттуу 39 жаштагы аялдан күмөн санагандыгын билдирген. Алардын берген алгачкы маалыматтарында, аял баланы Күн-Туу айылына алып барып, димедрол кошулган суюктукту ичирген. Өлчөмүнөн көп берип койгондуктан, бала көтөрө албай каза болуп, кылмышкер Майрам окуучуну чуңкурга таштап салган.
Аял акча талап кылган катты Даниэл өлгөндөн кийин жазган.
