БИШКЕК, 31-дек. – Sputnik. Жылан жылы узап кой жылы кирип келген түнү, тагыраагы 2014-жылдан 2015-жылга оогон түндө бир сутканын ичинде республика боюнча 20 жол кырсыгы катталып, 38 өрт чыккан.
Өрткө каршы мамлекеттик кызмат агенттигинин өрттү алдын алуу башкармалыгынын маалыматына ылайык, 11 өрт кырсыгы пиротехникалык каражаттардын пайдалануудан жаралган. Жыйынтыгында бир адам каза таап, дагы бирөө жаракат алган.
Ал эми ИИМдин маалыматы боюнча катталган 20 жол кырсыгынан төрт адам каза тапкан. Кырсыктын көбү унааны мас абалда айдоого байланыштуу болгон. Жалпысынан 24 адам ар кандай жаракат алган.
Sputnik Кыргызстан 2016-жылды кырсыктан сырткары тосуу үчүн кандай даярдыктарды көрүү керек экенин билип көрдү. Өрттү алдын алуу бөлүмүнүн башчысы Адилет Жекшенбаев кыргызстандыктарга төмөнкүдөй кеңештерин берди.
- Жаңы жылды коопсуз жана майрамдык маанайда өткөрүү үчүн пиротехниканы адистештирилген дүкөндөрдөн сатып алып же колдон келсе колдонбой коюу керек
- Балатыга жагылган шамдардын кубаттуулугу 25 вольттон ашпоосу зарыл
- Бенгал шамдарын күйгүзүү коркунуч жаратат. Себеби, чачырандылары саманга же синтетикалык кийимдерге түшүп кетсе, өрт чыгышы мүмкүн
- Балатылар эл чыгуучу жолдорду тоспогондой жерге коюлушу керек
- Пиротехниканы адистештирилген дүкөндөрдөн сатып алган жакшы. Себеби, ал жактан жок дегенде, жасалмасына туш болбойсуз, бул албетте, коопсуз болот
- Пиротехниканы кайсыл жеринен тутандырып, билиги канча убакытка чейин күйүп, ракеталар кайсы жакты көздөй уча тургандыгын уялбастан суроо керек. Мындан сырткары, пиротехникалык заттарды колдонуу жөнүндөгү көрсөтмө мамлекеттик же болбосо расмий тилде жазылуусу шарт
- Жаңы жыл түнү салютту керектүү убакта, белгиленген жерде гана аттыруу керек. Алардын учкуну бирөөнүн жыйылган чөбүнө же балконуна түшпөгөндөй болушу шарт
- Кокустан өрт чыгып чоң аянтты жалмап кетпеши үчүн үйгө өрт өчүрүүчү каражат алып коюу туура болот
Sputnik Кыргызстан бардыгыңыздарды жаңы жыл майрамыңыздар менен куттуктап, коопсуз майрамдык кече каалайт.
