БИШКЕК, 30-дек. — Sputnik. Кыргызстан Казакстандан электр кубатын былтыркы баада алууну пландап жатат деп билдирди журналисттерге мурдагы энергетика министри, өкмөт башчынын кеңешчиси Кубанычбек Турдубаев.
Турдубаевдин айтымында, импорттоо Токтогул ГЭСиндеги оңдоп-түзөө иштеринин мөөнөтүнө байланыштуу, тактап айтканда, 2016-жылдын 16-январына чейин болот.
"Учурда электр кубатын эң зарыл болгон учурда гана импорттоо боюнча маселе коюлуп жатат. Азырынча, элди камсыз кылуу боюнча кубаттуулук жетиштүү. Электр кубатына болгон тариф аныкталган жана импорттон улам наркы кымбаттабайт ",— деди министр.
Турдубаев учурда Экибастуз ГРЭСи жана Жамбыл ГЭСи менен сүйлөшүүлөр жүрүп жаткандыгын айтты.
"Биз өзүбүздүн сунушубузду киргизип, эми казак тараптан жооп күтүп жатабыз, бирок, макулдашуулар болгон. Казакстан алдын ала төлөө жолу менен иштейт жана каражат ар бир декада сайын түшүп турушу керек", — деп кошумчалады ал.
Буга чейин премьер-министр Темир Сариев Каржы министрлигине импорттоп, электр кубаты менен толук көлөмдө камсыз кылууга каражат табуу милдетин жүктөгөн.
Бир апта мурда өлкөнүн эң ири Токтогул ГЭСинде авария болуп, эки гидроэлектростанция иштен чыккан. Министрлер кабинети январдан тарта электр кубаты менен камсыздоодо чектөөлөр болушу мүмкүндүгүн эскерткен.
