БИШКЕК, 30-дек. — Sputnik. Билим берүү тармагын колдогон эл аралык донорлордун каражатына электрондук билим берүү долбоорун ишке киргизүү каралууда. Анын алкагында республика боюнча 116 электрондук китепкана түзүлмөкчү. Бул туурасында Билим берүү жана илим министрлигинин маалымат кызматынан билдиришти.
"Бул гранттык техникалык жардам конкурстун негизинде берилет. Долбоор камсыз кылып бере турган электрондук китепкана энциклопедиядан, видеотека, аудиотекадан, андан сырткары интерактивдүү материалдардан турат", — деп жазылган таратылган маалыматта.
Андан сырткары мектептер өзүнүн потенциалын колдонуп да, кошумча электрондук китепканасын түзө алышат.
Окутуунун заманбап түрүн колдонобуз деген ниетте аталган конкурска катышууну каалаган мектеп администрациялары 2016-жылдын 15-январына чейин арызын берсе болот.
Министрлик мындай аракет окуу материалдарынын жетишсиздигин жана мектептердин билим берүү ресурстарына жеткиликтүүлүгүн шарттай турганын белгилөөдө.
