БИШКЕК, 29-дек. — Sputnik. "Ала-Тоо" борбордук аянтында болуучу жаңы жылдык салют 8-10 мүнөткө созулуп, кичинеден чоңго карай принциби менен түзүлө турганын Sputnik агенттигине "Росалют" компаниясынын өкүлү Евгений Красный билдирди.
Красныйдын айтымында, салютта 1,5 метр бийиктиктеги пиротехникалык замбиректер пайдаланылат. Алгач 30-40 метрге чейин жеткен салюттар атылып, андан соң алардын бийиктиги өсө бермекчи.
Жаңы жылдык оюн-зооктун туу чокусу болуп желпүүр сымал түзүлүштөн атылган эки салют болмокчу. Анын ар биринен 650 ирет салют атылат.
"Бул "алтын таажы" деп аталат. 20 секунддун ичинде 1300 ирет атылмакчы", — деди Красный.
Андан кийин асманды ажайып кооздукка бөлөгөн нерселер болорун кошумчалап, жылдыз, жамгыр жана хризантемаларга окшош шарлар асманга кое бериле турганын айтты.
Бул убакыттын ичине салют 1,5 миң ирет атылат.
