Бишкек менен Көлдөгү аэропорттун ремонтуна Кыргыз-орус өнүктүрүү фонду акча бөлөт

Жазылуу
Фонддон алынган каражат аэропорттордун инфраструктурасын жакшыртып, жүргүнчүлөр санын көбөйтүү менен инвестиция тартууга өбөлгө болот.

БИШКЕК, 28-дек. — Sputnik. Эмдиги жылы Кыргыз-орус өнүктүрүү фонду Бишкектеги "Манас" жана Ысык-Көлдөгү аэропорттордун жаңыланышын каржылайт. Бул тууралуу фондун төрайымы Нурсулуу Ахметова маалымат жыйында билдирди.

Буга чейин аталган ишканалар фондго Кыргызстандагы эл аралык аэропорттордун өнүгүүсүнө байланыштуу үч долбоор сунуштаган. 

Ахметованын айтымында, фонд эки долбоордун аткарылышын карайт.

"Өлкөнүн унаа потенциалын өнүктүрүү боюнча кеп көптөн бери айтылып келет. Анын үстүнө буга тышкы кырдаал жакшы мүмкүнчүлүк түзүп берип жатат. Биз жүргүнчү ташыгандар жана туристтер үчүн ыңгайлуу инфраструктура түзүшүбүз керек", — деди ал. 

Мындан тышкары, Ахметова учурда фонд тарабынан 7,2 миллион долларга тикелей каржылаганын канаттуу өстүрүү боюнча долбоор иштеп жатканын белгиледи. Анын айтымында, жайдын ортосу менен ишканада эмне иш жасалганы текшерилет. 

"Бүгүнкү күндө 25 миллион долларлык үч долбоор даяр турат. Биринчиси текстиль өнөр жайына байланыштуу келип, пахтадан жасалган кездемелерди боей турган фабриканын салынышы каралган. Бул тармак Кыргызстанда колго алынган эмес. Мындай фабриканын курулушу тигүүчүлөр менен текстиль тармагындагы ишкерлерге өндүрүштү кеңейтүүгө негиз берет", — деди Ахметова.

Кыргыз-орус өнүктүрүү фонду былтыр түзүлүп, Кыргызстан менен Россиянын өкмөттөрү ортосундагы макулдашуунун негизинде иш алып барат.

Жаңылыктар түрмөгү
0