ЖМК: Эки Кореянын ортосундагы кризистен улам, АКШ рекорддук суммадагы курал-жарак сатты

БИШКЕК, 27-дек. — Sputnik. Курал-жарак сатуу боюнча АКШ дүйнөдөгү дагы деле лидерлерден экенин The New Yort Times гезити конгресске берилген докладка шилтеме берүү менен билдиргенин РИА Новости маалымдады.

2014-жылы Америка курал-жарак сатуудан 36,2 миллиард доллар пайда көргөн. Экинчи орунда 10,2 миллиард доллар менен Россия турат. 5,5 миллиард доллар таап Швейция үчүнчү орунга илинди. Андан кийин Франция (4,4 миллиард доллар) менен Кытай (2,2 миллиард доллар) төртүнчү жана бешинчи орунду ээлешти.

Катар, Сауд Аравиясы, Түштүк Корея менен түзүлгөн келишимдер Вашингтонго миллиарддаган пайда алып келип, АКШ дүйнөдөгү курал-жарак рыногунун 50 пайыздан ашык бөлүгүн ээлеген. Америка ошондой эле, Корей жарым аралындагы чыңалуудан да пайда көргөн. Сеул жети миллиарддан ашык долларга АКШдан курал-жарак сатып алган.

АКШдан курал сатып алгандардын экинчи тизмесинде Ирак турат. Алар 7,3 миллиард долларга Американын аскерлери өлкөдөн чыгып кеткенден кийин курал-жарак алышкан.

Үчүнчү орунда Бразилия турат. Аталган өлкө куралдуу күчтөрүн чыңдоо үчүн 6,5 миллиард доллар короткон. Каражаттын көбү тик учак алууга жумшалган.

2014-жылы дүйнө жүзүндө курал-жарак сатып алуу боюнча 71,8 миллиард долларга мыйзамдуу келишимдер түзүлгөн.

Ал эми былтыр Россиянын курал-жарактарын Индия менен Кытай көп сатып алган.