БИШКЕК, 27-дек. — Sputnik. Кыргызстандын Ички иштер министрлиги башка мамлекеттерден каржыланган митингдерди өткөрүүгө тыюу салууга ниеттенип жатат.
ИИМ Баш мыйзамдын 34-беренесине ылайык ар бир жаран митинг өткөрүүгө укуктуу экенин эскертет. Ал эми ага катышар-катышпасын ар ким өзү чечет.
Бирок, министрлик чогулуштар башка мамлекеттен каржыланган учурлар да кездешерин белгилейт.
"Мындай абал мамлекеттеги кырдаалдын туруксуздашуусуна алып келип, улуттук коопсуздукка коркунуч жаратышы мүмкүн. Муну менен бирге коомдук тартипке бүлгүн салып, калктын ден соолугуна зыян алып келиши толук ыктымал", — деп айтылат билдирүүдө.
Мыйзамдолбоордо тынч митингдер уюштуруучулардын жеке каражатынын эсебинен өтөрү айтылат. Мында демилгечилер мамлекеттик жана жергиликтүү бийлик органдарына кат менен кайрылып, митинг тууралуу кабардар кылышы шарт.
Долбоордо тынч митингдердин чет өлкөдөн, же башка мамлекеттин жарандары менен уюмдардан каржыланып өткөрүлүшүнө жана аталган жактардан акча алууга тыюу салуу сунушталат.
