БИШКЕК, 23-дек. — Sputnik. Улуттук жоокердик өнөрдүн бир түрү болгон "Кулатуунун" негиздөөчүсү Темир Турусбеков каза болгонун Sputnik агенттигине анын тарбиялануучуларынын бири, Кыргызстандын эмгек сиңирген машыктыруучусу Таалайбек Алишев билдирди.
Анын айтымында, Турусбеков мындан бир ай мурун инфаркт болгон. Бул жолу да жүрөгү кармап, ошондон каза болгон.
Кулатуу кыргыздын кол менен салгылашуу боюнча "Мушташ" эрежесинин багыттарынын бири болуп саналат. Ал эми кол менен салгылашуу мектептерине "Эр сайыш", "Оодарыш", "Күрөш", "Кулатуу", "Камбартеп", "Тай тебиш", "Коен тебиш" жана башкалар кирет.
Кулатуунун эрежелери Темир Турусбеков тарабынан 1984-жылы иштелип чыккан. 1990-жылы Кыргыз Советтик Социалисттик Республикасынын Кулатуу боюнча федерациясы түзүлүп, анын президенттигине Турусбеков шайланган.
