БИШКЕК, 21-дек. — Sputnik. Быйыл Кыргызстанда экономикалык өсүш 3,6 пайызды түзүп, ички дүң продукциянын көлөмү 373 миллиард сомду түздү. Бул тууралуу премьер-министр Темир Сариев Жогорку Кеңешинин Бюджет жана финансы боюнча комитетинин кеңейтилген жыйынында билдирди.
Ага ылайык, жыйын жүрүшүндө Сариев "2016-жылга республикалык бюджет жана 2017-2018-жылдарга бюджеттин божомолу жөнүндө" мыйзам долбоору боюнча маалымат берди.
Сариев доллар кунунун өсүшү жана бажы тарифтеринин жогорулаганына карабастан быйылкы жылдын 11 айында инфляциянын деңгээли 2,3 пайыз түзүп, жылдын аягына чейин 3,5 пайыз деңгээлинде болжолдонуп жатканын айтты.
Өкмөт башчы Евразия экономикалык биримдигине кирген өлкөлөр ичинен Кыргызстан эң төмөнкү инфляциялык көрсөткүчкө жетишкенин, быйыл инфляциянын деңгээли Россияда – 12,5 пайызды, Беларуссияда – 12,3 пайызды, Казакстанда – 10,1 пайызды жана Арменияда — 4,2 пайызды түзгөнүн мисал келтирди.
Ошондой эле Сариев өкмөт 2016-жылга инфраструктуралык долбоорлорду ишке ашырууга, ишкерликке жана бизнеске ыңгайлуу шарттарды түзүүгө өзгөчө көңүл буруларын белгиледи. Муну менен катар айыл чарба тармагындагы жаңы технологияларды жайылтуу, кайра иштетүү жана аймактарда жаңы ишканаларды түзүү боюнча активдүү чаралар көрүлмөкчү.
"Өкмөт бюджет антикризистик чараларды көрүп жатат. Бюджетти иштеп чыгууда учурдагы кырдаал эске алынды", — деп маалымдады премьер-министр.
Ошондой эле өкмөт башчы бюджеттин аткарылышы жана анда каралган каражаттарды эффективдүү пайдаланууну көзөмөлдөөгө өзгөчө көңүл буруларын баса белгиледи.
