БИШКЕК, 21-дек. — Sputnik. Евробиримдиктин Россияга карата экономикалык санкцияларды узартуу чечими 22-декабрдан тарта күчүнө кире турганын биримдиктеги булакка таянуу менен РИА Новости билдирди.
Буга чейин Украинанын президенти Петр Порошенко дүйшөмбү күнү Евробиримдик Россияга карата коюлган санкциялар 2016-жылдын 31-июлуна чейин узара турганын расмий билдирерин айткан.
"Чечим шейшемби күнү — биримдиктин журналына расмий жарыялангандан кийин күчүнө кирет", — деди агенттиктин маектеши.
Евробиримдик мамлекеттеринин туруктуу өкүлдөрүнүн кеңеши (Coreper) жума күнү Россияга каршы санкцияларды 2016-жылдын 31-июлуна чейин узартууну колдоп берген.
Россия менен Батыштын мамилеси Украинадагы абалдан улам курчуп кеткен. Алгач санкцияларды Евробиримдик менен АКШ айрым адамдар менен компанияларга карата кабыл алса, кийин жалпы Россия экономикасына каршы багытталган. Ал эми Россия жооп катары ага карата санкция киргизген АКШ, Канада, Австралия, Норвегия жана ЕБ өлкөлөрүнөн импортту токтоткон.
